जेठ मसान्तभित्रै चुनाव गर्ने सत्तारुढ दलमा राजनीतिक सहमति भएसँगै स्थानीय चुनावको सुरक्षामा आवश्यक सुरक्षाकर्मी र सुरक्षा खर्च कत्ति चाहिन्छ भन्नेबारे पनि चासो बढेको छ ।
गृह प्रशासन र सुरक्षा निकायका अधिकारीहरू सुरक्षा तयारी भन्दाअघि चुनावको मिति घोषणा हुनुपर्ने बताउँछन् । प्रहरी महानिरीक्षक शैलेश थापा क्षेत्रीले केही दिनअघि पत्रकारहरूसँगको अनौपचारिक भेटमा प्रहरीलाई गाडी खरिदका लागि ९ अर्ब मागेको बताएका थिए ।
प्रहरी युनिटहरूका पुराना गाडी विस्थापन गर्न केही महिनाअघि गृह मन्त्रालयमार्फत अर्थ मन्त्रालयमा लेखापढी गरेर पठाए पनि प्रहरी प्रधान कार्यालयले बजेट पाएको छैन ।
बजेट निकासा भएमा त्यही खर्चमा चुनावका लागि आवश्यक गाडी खरिद गर्न सकिने प्रहरी प्रधान कार्यालयको भनाइ छ ।प्रहरीलाई विगतमा निर्वाचनका बेला भारत सरकारले पनि सवारी साधन सहयोग गर्दै आएको थियो ।
नेपाल प्रहरीका एक उच्च अधिकृत जिल्ला प्रहरी कार्यालय र सहरी क्षेत्रका प्रहरी युनिटसँग भएका पुराना गाडीहरूको भरमा चुनावको सुरक्षा निकै सकसपूर्ण हुने बताउँछन् ।
