कैलालीको घोडाघोडी नगरपालिका–१ घोडाघोडीमा अवस्थिति घोडाघोडी तालको बाँध पुनः निर्माण तथा प्रवेश पार्क निर्माण कार्य पुरा नबित्दै भत्किन थालेको छ । निर्माण व्यवसायीले गुणस्तर हीन काम गरेको कारण घोडाघोडी तालको बाँध तथा प्रवेश पार्क भत्किन थालेको हो । अहिले बनेका विभिन्न संरचनाहरू चर्किनुको साथै भत्किन थालेका छन् ।
निर्माण कम्पनीले गुणस्तरहीन निर्माण सामग्रीको प्रयोग र मापदण्डविपरित काम गरेको स्थानीहरूले बताएका छन् । सम्बन्धित निकायमा पटक–पटक जानकारी गराउँदा पनि बेवास्ता गरिएको कारण काम गुणस्तर हीन भएको स्थानीय दीपक शाहलेको भनाई छ । स्थानीय सरकार र सम्बन्धित सरोकारवाला निकायको बेवास्ताको कारण घोडाघोडी तालको बाँध पुनः निर्माण तथा प्रवेश पार्क गुणस्तरीय बन्न नसकेको उनको भनाई छ ।
विभिन्न ठाउँमा चिरा परेको र भत्किएको स्थानीयले बताएका छन् । निर्माणका क्रममै गडबड गरिएको स्थानीयले शङ्का गरेका छन् । पर्यटन विभाग र घोडाघोडी नगरपालिकाको साझेदारी सहयोगमा निर्माणाधीन उक्त निर्माण कार्य भइरहेको छ । तर उक्त निर्माण कार्य रोकिएको लामो समय बितिसक्दा समेत काम पुनः सुरु भएको छैन ।
गत भदौमा घोडाघोडी नगरपालिकाले बाँध पुनः निर्माण तथा प्रवेश पार्क निर्माणका लागि ठेक्का प्रक्रियाबाट श्रीदेव सिंह, अन्जु जे.बी. निर्माण कम्पनीलाई निर्माणको जिम्मा दिएको थियो । एक करोड ९२ लाख ८४ हजार ९८८ रुपियाँमा ठेक्का सम्झौता भएको सो निर्माण कम्पनीले सम्झौता भए लगतै भदौ महिनादेखि काम सुरु गरेको थियो । निर्माणको विषयमा बुझ्न खोज्दा निर्माण कम्पनीका सञ्चालक नन्दसिंह जोरा मोबाइल अफ गरेर सम्पर्क विहीन भएका छन् ।
घोडाघोडी नगरपालिकाका योजना शाखाका प्रमुख सन्तोष चन्दले विभिन्न ठाउँमा चिरा परेको र भत्किएको उनले स्वकार गरेका छन् । के कारणले त्यस्तो हुन गएको भन्ने बारेमा चाडै अनुगमन हुने उनले बताए । निर्माण कम्पनीले गल्ती गरेको पाएमा पुनः निर्माण गर्न लगाइने उनले बताएका छन् । नगरपालिकाले छुटाएको रकम निर्माण कम्पनीले लगिसकेको बताउँदै सङ्घबाट आउने रकम नआएपछि निर्माण कार्य रोकिएको उनको भनाई छ ।
नगरपालिकाबाट खर्च गरिने ८६ लाख रकम निर्माण कम्पनीले लगिसकेको छ र बाँकी एक करोड १५ लाख सङ्घबाट आउने रकम नआएकाले काम रोकिएको योजना शाखाका प्रमुख सन्तोष चन्दले बताए । अघिल्लो सरकारले छुटाएको रकम सरकार परिवर्तन भएपछि रोकिएको उनको भनाइ छ ।
