शुक्रबार सेती प्रादेशिक अस्पतालमा थप ५१ जनामा कोरोना भाइरसको संक्रमण पुस्टि भएको छ। पछिल्लो २४ घण्टामा अस्पतालमा ६५७ जनाको नमुना परीक्षण गर्दा थप ५१ जनामा संक्रमण पुस्टि भएको अस्पतालका सूचना अधिकारी दिलीप कुमार श्रेष्ठले बताए।
जसमध्ये ५ पुरुष र १ महिला गरी ६ जना धनगढी उपमहानगरपालिकाका रहेका छन्। यस्तै धनगढी बाहेक कैलालीका ४२ जना र अन्य जिल्लाका ३ जनामा संक्रमण पुस्टि भएको छ।
पछिल्लो २४ घण्टामा अस्पतालबाट १० जना निको भएर घर फर्केका छन् भने थप ८ जना नयाँ संक्रमित भर्ना भएका छन्।हाल अस्पतालमा ४८ जना संक्रमित उपचाररत छन्। १४ जना आईसीयूमा, ३ जना भेन्टिलेटर र ३२ जना अक्सिजन सपोर्टमा उपचाररत रहेको रहेको सूचना अधिकारी श्रेष्ठले बताए।
यस्तै पछिल्लो २४ घण्टामा अस्पतालमा उपचाररत २ जना संक्रमितले ज्यान गुमाएका छन्। कैलालीको गोदावरी नगरपालिका–९ का ५० वर्षीय पुरुष र घोडाघोडी नगरपालिका–१ का ५७ वर्षीय पुरुषको मृत्यु भएको सूचना अधिकारी श्रेष्ठले बताए।
